22 Aug Merke, gereed… dis tyd vir Erfenistoer 2023!
Merke, gereed… dis tyd vir Erfenistoer 2023!
George, Tuinroete (August 2023) – Terwyl Augustus verbyspoed, berei Suid-Afrika voor om Erfenismaand te vier, en te midde van hierdie afwagting is lede en metgeselle van die Suid-Kaap Oumotorklub besig om hul geliefde voertuie noukeurig na te gaan vir die jaarlikse Erfenistoer. Vanjaar se geleentheid vind plaas van 22 tot 25 September, en ‘n merkwaardige reis is gewaarborg.
Die Erfenistoer is ‘n onmisbare geleentheid vir beide nuwe en terugkerende deelnemers, en volgende maand se uitstappie sal die tradisie voortsit van trotse eienaars wat met hul geliefde klassieke karre pronk. Die toer dien as spoggeleentheid vir die Suid-Kaap Oumotorklub, en is ‘n tasbare viering van Suid-Afrikaanse motor-erfenis, teen die asemrowende agtergrond van die Wes-Kaap se mooiste paaie.
Die 2023-reisplan bepaal dat die toergroep die betowerende paaie van die Overbergstreek ontdek, met ‘n verskeidenheid natuurskoon wat langs die pad geniet kan word. Arniston en Bonnievale is gekies as oornag-rusplekke, wat ‘n tikkie sonderlinge sjarme by die reis voeg. En tussen hierdie skilderagtige dorpies is die roete besaai met fassinerende historiese landmerke en boeiende besienswaardighede.
Dié jaar is die 11de aanbieding van hierdie unieke geleentheid, gereël deur die Suid-Kaap Oumotorklub en hartlik ondersteun deur Halfway Toyota George. Die vloot begin sy reis by Halfway se hoofkwartier, geleë in Knysnaweg. Daar word verwag dat ‘n skare entoesiastiese oumotorliefhebbers die kans op 22 September sal gebruik om aan toerdeelnemers ‘n opregte ‘bon voyage’ toe te wens.
Dag 1 van die toer neem bestuurders van George na Swellendam – ‘n dorp met ‘n ryk geskiedenis wat terugdateer tot sy stigting in 1743 as derde oudste landdrosdistrik in Suid-Afrika. ‘n Hoogtepunt van die dag se roete is ‘n besoek aan Drostdy Museum, gevolg deur ‘n rit na The Dunes at Arniston, met ‘n sjampanje-stop by Kaap Agulhas Vuurtoring op die vasteland se suidelikste punt.
Die tweede dag se reisplan sluit russtoppe in by besienswaardighede soos die Danger Point-vuurtoring en Birkenhead Brewery, een van die land se vroegste vakmansbrouerye wat terugdateer na 1998. Terwyl die navigators hulle maar alleen sal moet verlekker in die brouery se handewerk, wag daar slegs die rustige rit terug na Arniston op bestuurders daardie middag.
Op Erfenistoer Dag 3 kan deelnemers uitsien na ‘n besoek aan Stettyn Family Vineyards, voordat hulle na Bonnievale se bekende Angora Stud-gasteplaas vertrek. Hierdie bekoorlike plaas is ook die tuiste van ‘n klassieke motormuseum, wat ‘n heerlike ervaring bied vir erfenisgesinde motoriste. Die konvooi keer terug na George tydens die laaste been van die toer op 25 September, met ‘n russtop by Adams Kraal, naby Ladismith op die R323.
Die Erfenistoerroete kronkel ook deur ander pragtige dorpies soos Baardskeerdersbos, Bredasdorp, Gansbaai, Napier, Caledon, Villiersdorp, Montagu, Barrydale en Riversdal. Die reis herdenk dus nie net Erfenismaand nie, maar strook ook met September as Toerismemaand, en stel deelnemers in staat om die uiteenlopende besienswaardighede wat deur die Overberg-streek gebied word, te ontdek.
Kyk uit vir die indrukwekkende vloot van 30 spesiale motors, wat die kerngroep vorm van deelnemers aan vanjaar se Erfenistoer van 22-25 September. Hierdie uitsonderlike voertuie sal eksklusief tydens aangewese teestoppe toeganklik wees vir die publiek om te bewonder. Om meer te wete te kom oor hierdie stilhouplekke en ander toerbesonderhede, stuur ‘n epos aan mimi@gojipr.net of skakel 084 583 3144.
Press release on behalf of Suid-Kaap Oumotorklub:
interface by goji
mimi finestone | mimi@gojipr.net | +27 84 583 3144